હવામાન વિભાગે આગામી પાંચ દિવસ સુધી ગુજરાતના વિવિધ શહેરોમાં કમોસમી વરસાદ સાથે ઠંડા પવનની આગાહી કરી છે. આજે સમગ્ર રાજ્યમાં વાદળછાયું વાતાવરણ છે અને કેટલીક જગ્યાએ 40 કિમી પ્રતિ કલાકની ઝડપે પવન ફૂંકાઈ રહ્યો છે. હવામાન વિભાગે વાવાઝોડાની આગાહી કરી છે. સાબરકાંઠા, બનાસકાંઠા, રાજકોટ, સુરેન્દ્રનગરમાં કરા સાથે હળવા વરસાદની સંભાવના છે. તો અમદાવાદ અને ગાંધીનગરમાં પણ હળવા વરસાદની શક્યતા છે. આગામી દિવસોમાં ઉત્તર ગુજરાત, દક્ષિણ ગુજરાત, સૌરાષ્ટ્ર અને કચ્છમાં કમોસમી વરસાદ પડી શકે છે. કમોસમી વરસાદથી કેરી, જીરૂ અને ઇસબગુલના પાકને નુકસાન થવાની સંભાવના છે.
હવામાન વિભાગે ગુજરાતના 12 જિલ્લામાં સાંજે 7 વાગ્યા સુધી વરસાદની શક્યતા વ્યક્ત કરી છે. સૌરાષ્ટ્ર, ઉત્તર અને દક્ષિણ ગુજરાતના વિસ્તારોમાં વરસાદની શક્યતા છે. તો દક્ષિણ ગુજરાત સહિત સૌરાષ્ટ્રમાં છુટોછવાયો કમોસમી વરસાદ અને કરા પડ્યા છે.દક્ષિણપૂર્વ રાજસ્થાન પર ચક્રવાતી પરિભ્રમણના પ્રભાવને કારણે કચ્છ વિક્ષેપિત હવામાનથી ઢંકાયેલું છે. કચ્છ જિલ્લાના વિવિધ વિસ્તારો, જિલ્લા મથક ભુજ અને આસપાસના ગ્રામ્ય વિસ્તારોમાં આજે સવારે વરસાદ પડ્યો હતો. ભુજ ઉપરાંત માધાપર, સુખપર, માનકુવા, ભુજોડી, કુકમા, લોરીયા પંથકના વિસ્તારોમાં ઝરમર વરસાદ અને વાવાઝોડાના કારણે રસ્તાઓ ભીના થઈ ગયા હતા. સવારથી વાદળછાયા વાતાવરણ વચ્ચે પૂર્વ કચ્છના અંજાર, ગાંધીધામ, ભચાઉ, રાપર વિસ્તારમાં ગાજવીજ સાથે વાવાઝોડું શરૂ થયું હતું.
અંજારના મુન્દ્રા વિસ્તારમાં આજે સવારે વરસાદ પડ્યો હતો.
ભરૂચ જિલ્લામાં બપોર બાદ વાતાવરણમાં પલટો આવતા વાદળછાયું વાતાવરણ રહ્યું હતું. અંકલેશ્વર સહિત અનેક તાલુકાઓમાં ધોધમાર વરસાદ વરસ્યો હતો. કમોસમી વરસાદના કારણે ખેતરોમાં પડેલા શાકભાજી, કેળાના પાક અને કપાસના પાકને નુકસાન થવાની સંભાવના છે.
ભાવનગર શહેરના કેટલાક વિસ્તારોમાં આજે બપોરે ધોધમાર વરસાદ પડ્યો હતો. ગોહિલવાડ પંથકમાં માવઠાની આગાહી કરવામાં આવી છે. કમોસમી વરસાદની આગાહીને ધ્યાનમાં રાખીને એપીએમસીમાં વેપારીઓ અને ખેડૂતોને સાવચેતી રાખવા અને સાવચેતીના પગલાં લેવા વિનંતી કરવામાં આવી છે. આ વિશે વધુ માહિતી માટે ગ્રામસેવક અથવા કિસાન કોલ સેન્ટર ટોલ ફ્રી નંબર – 1800 180 1551 નો સંપર્ક કરો.
અમરેલીમાં સવારથી વાદળછાયું વાતાવરણ હતું. આ પછી સાંજે ગાજવીજ સાથે ઝરમર ઝરમર વરસાદ વરસ્યો હતો. એટલું જ નહીં સમગ્ર ઉનાળા દરમિયાન વરસાદ અને કરા સાથે ચોમાસા જેવો માહોલ બની ગયો હતો.
અમરેલી જિલ્લાના ધારી તાલુકાના ગ્રામ્ય વિસ્તારોમાં પણ કમોસમી વરસાદ પડ્યો હતો. ગોવિંદપુરમાં ભારે વરસાદથી રસ્તાઓ અને નદીઓમાં પૂર આવી ગયા છે.
આ સાથે ધારીના એક ગામમાં મુશળધાર વરસાદથી નદીમાં પૂર જેવી સ્થિતિ સર્જાઈ હતી. ધારી સહિત આસપાસના ગામોમાં વીજળીના કડાકા સાથે વરસાદ પડ્યો હતો.
એક તરફ ઉનાળાની શરૂઆતમાં કમોસમી વરસાદ આવે છે. ત્યારે કેસર કેરીનો ગઢ ગણાતા ગીર વિસ્તારના ગામડાઓમાં કેરીના પાકને ભારે નુકશાન થવાની ભીતિ સેવાઈ રહી છે. આંબરડી, જાર, મોરઝર સહિતના ગામોમાં કેરીના પાકને ભારે નુકસાન થવાની ભીતિ સેવાઈ રહી છે.
દક્ષિણ ગુજરાતની વાત કરીએ તો સવારથી સમગ્ર જિલ્લામાં ભારે વરસાદ પડી રહ્યો છે. જેના કારણે અનેક વિસ્તારોમાં ભારે વરસાદ થયો હતો.
આ ઉપરાંત સુરત શહેરના માંગરોળ વિસ્તારમાં વરસાદની સાથે કરા પણ પડ્યા હતા. જેના કારણે ભાદરવો જેવો માહોલ સર્જાયો હતો.
તો ગુજરાત હવામાન વિભાગે પણ આગામી એક સપ્તાહ સુધી આવી જ વરસાદની સ્થિતિની આગાહી કરી છે. એટલું જ નહીં, મધ્ય ગુજરાત સહિત સમગ્ર ગુજરાતમાં છૂટાછવાયા વરસાદની શક્યતા પણ દર્શાવી છે.